Open the cart

Details.
Sirvart Karamanuk ՍԻՐՎԱՐԴ ԳԱՐԱՄԱՆՈՒԿ

01\12\1912-20\10\2008
ZVN_0460
Սիրվարդ Գարամանուկ ծնած է 1 Դեկտեմբեր 1912ին, որպէս հինգերորդ զաւակը Բարսեղ-Տիգրանուհի Գալփաքեան ամոլի։ Իր նախնական կրթութիւնը ստացած է երբեմնի Տայեան, ապա Էսաեան վարժարաններու մէջ։ Երաժշտական ունակութիւնները երեւան եկած են վաղ հասակին եւ ուսանած է Ստանպուլի
Երաժշտանոցի մէջ, ուրկէ շրջանաւարտ եղած է գերազանցութեամբ, 1939 թուականին։
Գարամանուկի առաջին յօրինումները, որոնք դաշնակի համար են կը
յայտնուին 1940ական թուականներուն ։ Գարամանուկ տակաւ կը զարգացնէ իր երաժշտական դաշտը, յօրինելով՝ բազմաթիւ երգեր, երգչախմբային աշխատութիւններ, երգչախումբի եւ նուագախումբի համար երկարաշունչ յօրինումներ (Աղթամար եւ Պետրոս Դուրեանի Երգը), լարաւորներու յատուկ կտորներ, մանկական օփէրէթ մը (Վաղուան Արուեստագէտները), մանկական երգեր եւ եկեղեցական երգերու մշակումներ։ Հայ գրականութիւնը եղած է իրեն համար ոգեշնչող տարր, որմէ առնուած երկերու համար յօրինած է երգեր։ Ստեղծագործած է արդիական շունչով։ Մանուկներու համար կատարած յօրինումները Ստանպուլահայ երգչախումբերու կողմէ երգուած են ։ Իր երկերէն ոմանք հրատարակուած են
հատորներով։ «Աղթամար» սէնֆոնիք պոէմը իր ամենածանօթ գործը եղած է ։ Գարամանուկի յօրինումները կատարուած են երկոտասանեակէ մը աւելի երկիրներու մէջ եւ արձանագրուած՝ հանրածանօթ մեներգիչներու եւ խումբերու կողմէ։ 1999’ին, Երեւանի Արամ Խաչատուրեան Թանգարանի կազմակերպութեամբ
տեղի ունեցած է իր գործերէն բաղկացեալ համերգ մը։ Իսկ տարի մը յետոյ տեղի ունեցած է նման համերգ մը՝ արուեստներու ներկայացման մեծ սրահին մէջ։ 2003ին, իր երգերը համերգով մը ներկայացուած են Երեւանի մէջ։ Յաջորդ տարի, իր համանուն սէնֆօնիք քերթուածին վրայ պատրաստուած Երաժշտական ֆիլմը՝ Աղթամարը, առաջին անգամ ցուցադրուած է Երեւանի Մոսկուայ Թատերասրահին մէջ։ Իր երկերը հրատարակուած են Հայաստանի Գրականութեան եւ Արուեստի Պետական Թանգարանի, Ամերիկայի Հ.Բ.Ը.Մ եւ Ստանպուլի Թրքահայ Ուսուցչաց Միութեան կողմէ։ Գարամանուկի կենսագրութիւնը տեղ կը գրաւէ նաեւ Who is who of women?
(Կիներէն ով ով է) եւ New Groveի երաժշտութեան եւ երաժշտագէտներու Բառարանի քանի մը հրատարակութիւններուն մէջ։ Հանգուցեալը Ամենայն Հայոց Երանաշնորհ Վազգէն Ա Կաթողիկոսի կողմէ պարգեւատրուած էր Ս. Սահակ-Մեսրոպ, Մեծի Տանն Կիլիկիոյ Արամ Ա. Կաթողիկոսի կողմէ՝ Ս. Մեսրոպ Մաշտոց, Կ.Պոլսոյ Մեսրոպ Բ Պատրիարքի կողմէ Պատրիարքական Աթոռոյ Պատուոյ Ա. կարգի եւ Պատրիարքարանի նորոգութեան շքանշաններով, իսկ Հայաստանի Հանրապետութեան
Նախագահ Ռոպէրթ Քոչարեան իր Հայ մշակոյթի ներդրումը շնորհաւորած է։ Գարամանուկի ծննդեան 95 ամեակի առթիւ կազմակերպուած մեծ ընդունելութեան լոյս տեսած էր Արաքսի Սարեանի «Երաժշտութեամբ Իմաստաւորուած Կեանք» անուն գիրքը :
Այսօր իմ երաժշտական կեանքս կը պարտիմ ողբացեալ Տիկին Սիրվարդ Գարամանուկի երախտապարտ եմ : Յարգանքով կը խոնհարիմ Ձեր անմահ վաստակին առջեւ «Սիրելի Օրիորդ»

Comments0

Comments are closed.